Në UShAF u mbajt dita informuese e programit Erasmus+

Përfaqësuesja e Zyrës së Erasmus+ për Kosovë, znj. Blerinë Zjaça – Osmani, mbajti një takim informues për stafin akademik, administrativ dhe studentët e Universitetit të Shkencave të Aplikuara në Ferizaj (UShAF).

Rektori i UShAF, Prof. Dr. Agron Bajraktari dhe prorektori për Bashkëpunim Ndërkombëtar, Prof. Dr. Bujar Pira, e falënderuan znj. Zjaça për këtë ditë informuese, e cila sipas tyre është shumë e rëndësishme, sepse studentët do të informohen për krijimin e mundësive për mobilitet, e cila përveç tjerash do të ndikoj edhe në ngritjen e cilësisë së arsimit të lartë në Kosovë.

Prorektori Pira, foli për të arriturat në kuadër të këtij Programi, projektet e realizuara dhe suksesin e studentëve që kanë qenë pjesë e mobilitetit në Universitete të Polonisë, gjë që e ka radhitur UShAF në njërin ndër partnerët më të përkushtuar.

Znj. Zjaça para të pranishmëve foli rreth programit Erasmus+, mundësitë që i ofron ky program për institucionet e arsimit të lartë nga vendet partnere, mundësitë e shkëmbimeve afatëshkurtëra, studimet e plota të nivelit master, përfitimet nga këto mundësi, mënyrën e aplikimit, etj.

Ndërsa, studenetja e UShAF, Lorita Rama, e cila ka qëndruar për një semestër në Universitetin e Ekologjisë dhe Menaxhmentit në Varshavë të Polonisë, foli për eksperiencën e saj gjatë qëndrimit në këtë Universitet dhe porositi studentët që të përfitojnë nga kjo mundësi që po ua ofron Universiteti.

“Isha me fat dhe e nderuar që kam qenë përfituese e bursës së mobilitetit. Ishte e vështirë që të ambientohemi me studentë nga vende me kultura dhe zakone të ndryshme nga ne, mirëpo falë programit Erasmus+, jo vetëm që kemi arrit të përshtatemi por arritëm edhe të mësojmë më shumë rreth tyre, gjë që ka ndikuar që jo vetëm të përfitojmë njohuri akademike por edhe më tej. Po ashtu, ishte emocionuese për ne studentet e mobilitetit, sepse na u dha mundësia që të udhëtojmë dhe të vizitojmë 12 shtete të Evropës”, theksoi Lorita.

Erasmus+ është programi më i ri arsimor i Bashkimit Evropian që synon modernizimin e sistemeve arsimore dhe përshtatjen e tyre me nevojat e tregut të punës dhe të një bote në ndryshim të vazhdueshëm. Erasmus+ bashkon në një ombrellë të vetme shtatë programet e mëparshme arsimore të BE-së duke lehtësuar orientimin e përfituesve dhe rregullat e pjesëmarrjes.