Rektori Bajraktari mori Letër Falënderimi nga Policia e Rajonit të Ferizajt

Policia e Kosovës – Rajoni i Ferizajt, prezantoi raportin vjetor për vitin 2016 në lokalet e Universitetit të Shkencave të Aplikuara në Ferizaj, me ç’rast ndanë Letër Falënderimi për rektorin e USHAF, Prof. Dr. Agron Bajraktari.

Nënkoloneli Gazmend Hoxha, drejtor rajonal i Policisë së Kosovës në Ferizaj, falënderoi të gjithë të pranishmit, në veçanti pjestarët e Policisë së Rajonit të Ferizajt për punën e shkëlqyer që bënë gjatë vitit 2016. Po ashtu, ai u shpreh mirënjohës ndaj rektorit Bajraktari, të cilin e përgëzoi për punën e palodhshme, bashkëpunimin dhe kontributin e dhënë për mbarëvajtjen dhe realizimin me sukses të projekteve të përbashkëta lidhur me sigurinë e përgjithshme të rajonit të Ferizajt.

Ndërkaq, z. Basri Shabani, zv/drejtor rajonal i Policisë së Kosovës në Ferizaj prezantoi raportin vjetor të Policisë së Rajonit për vitin 2016, ku foli për të arriturat dhe sfidat që patën gjatë vitin të kaluar dhe ato që e presin gjatë vitit 2017.

Rektori Bajraktari, falënderoi Policinë e Rajonit të Ferizajt për bashkëpunimin dhe mirënjohjen që i bënë dhe tha që kjo i jep edhe më shumë vullnet që të bëjë më të mirën e mundshme për Universitetin dhe gjithë qytetarët e Ferizajt dhe më gjerë.

Të dyja palët u zotuan që bashkëpunimi mes tyre do të vazhdojë në të mirë të krijimit të frymës pozitive dhe të sigurtë për studime, investime dhe zhvillim ekonomik.

Të pranishëm në këtë eveniment ishin edhe zv/ministri i Punëve të Brendshme – z. Nehat Mustafa, kryetari i komunës së Ferizajt – z. Muharrem Sfarqa, kryetari i komunës së Shtimes, Hanit të Elezit, përfaqësues të KFOR-it dhe FSK-së, përfaqësues fetarë, përfaqësues të Postës së Kosovës, Administratës Tatimore të Kosovës, gjykatës, etj.