Memorandum Mirëkuptimi mes UShAF dhe GIZ me fokus Qendrën për zhvillim të karrierës

Rektori i Universitetit të Shkencave të Aplikuara, Prof. Dr. Agron Bajraktari dhe drejtori i GIZ për Kosovë dhe Maqedoni, z. James Macbeth Forbes, nënshkruan Memorandum Mirëkuptimi mes Universitetit dhe kësaj organizate gjermane, që ka në fokus krijimin e Qendrës për zhvillim të karrierës dhe Alumni.

Gjatë nënshkrimit të Memorandimit, i cili u bë në ambientet e GIZ-it, rektori Bajraktari i shpjegoi z. Forbes historinë e Universitetit, të veçantat që e dallojnë nga universitetet tjera në Kosovë, infrastrukturën dhe programet, në të cilat zhvillohen studimet. Po ashtu, Rektori foli edhe për praktikën e studentëve, avancimin e tyre në këtë Universitet dhe punësimin e shumicës nga ta ende pa i përfunduar studimet.

Rektori Bajraktari përmendi edhe lidhshmërinë me industrinë dhe tha se jemi i vetmi Universitet qe kemi Bordin Industrial. “Universiteti ynë është në shërbim të bizneseve sa i përket kurrikulave dhe zhvillimit të tyre sipas ideve dhe kërkesave që kanë”.

Rektori shprehu dëshirën që UShAF të marrë më të mirën nga përvoja e shtetit gjerman që është i njohur për suksesin e treguar në mësimin dual dhe shkencat e aplikuara. Ndërsa, ai falënderoi GIZ-in që po jep një kontribut të madh përmes këtij Memorandumi për Universitetin, studentët dhe bizneset.

Po ashtu, rektori Bajraktari ftoi z. James që të vizitojë UShAF dhe të shohë nga afër punimet kreative të studentëve brenda objektit të Universitetit.

Drejtori i GIZ për Kosovë dhe Maqedoni, z. James Macbeth Forbes falënderoi rektorin Bajraktari dhe tha se kemi disa memorandume të mirëkuptimit me universitete të Kosovës, mirëpo shprehu knaqësinë që kësaj radhe do të bashkëpunojë me një universitet që është i profilizuar dhe më afër  tregut të punës me programet që ofron.

This post is also available in: English